ድገኛ ሰበይቲ መን ይረክባ

ሪም ኢያ ሽማ ሪም ንሓዳራ
ትጽዕር ትደክም ፈትልን መርፍእን ኣላዚባ
ትሰርሕ ኣብ ጎድኒ ሰባያ ኣምላካ ተወኪላ

ኣየወ ጣዕሚ ልስሉስ ባህርያታ
ኣፋ ትከፍት ብጥበብ ብቀስታ
ትሑት ዘዳምጻ ላህጃ ናይ ቃላታ
ንሳ እወ ንሳ ናይ ጭንቀት ደበና ቀንጢጣ
ካብ ማዕሙቅ ጥፋት ሂወት ንድሕሪት መሊሳ
ንምላሽ ተርባጽ ንታሕቲ ቀኒሳ
ብሓቂ ንሳ ንዝናሃረ ትመልስ ብጥበብ ብቀስታ
ካብ ሕማቅ ተግባር ትቅይር ብላዛ
ሓቂ ተወንዚፋ ጸጋ ተጎዝጊዛ
ንሳ ልዕሊ ኩሉ ውሽጣ ኢዩ ጽብቄኣ
ከም ጻሓይ ቀትሪ ኣዚያ ደሚቃ
ይበል ትዕድልቲ ፍጹም ዘይትስርነቅ
ሕሉፍ ትሕትንኣ ባሃም ዘይትንዕቅ


ኣየ እወ ንሳ ሓድነት ፍቅሪ ኢዩ ዘገድሳ
ኣይትነብርን ኢያ ስለ ነብሳ
ኣምላኽ እንድዩ ምስጢር ናይ ሂወታ
ንሳ ብርሃን ገዛ ኢያ ከም ብርቱዕ ባና
ዳሃያ ጥዑም ከም ድምጺ በገና
ስሌካ ትሓስብ ትጽሊ ደኒና

ኣሰይ ሩፍታ ታዓዲሉ ናይ ዚኣ ባዓል ቤት
ጎይታ ባሪክዎ ልዕሊ ኩሉ ፍጥረት
ከሕልፍ ናብራ ሕጉስ ብርሃን ሂወት
ኣየ እወ ብሓቂ ዋላ እንተገሸ ናብ ዘበለ ኣቢሉ
ዋላ ይድከም ኣብ ስራህ ዊዒሉ
ድካም ኣይስምዖን ከም ልቡ ታዓዲሉ
እግዚኣብሄር እንድዩ ሰሊዑ ደርቢይሉ

ኣየ እወ ትርግታ ልቡ ቀኒሳ
ሕሰም ካብ ቅድሚ ዓይኑ ሃሲሳ
ደቂሱ ተንሲኡ ነዚ እንድዩ ተማህሊሉ
ኤቨን -ኤዘር ግና ጾሎቱ መሊስሉ
ስለዚ ብሪም ኮሪዑ
በርሃው ኢልዎ ገጹ ተወሊዑ
እቲ ቀደም ዝነብዐ ኣዒንቱ
ኣይሓፈረን ኣምላኩ ተጸጊዕ
ኣየወ ልቦና ደስ ዘብል ውህበት ጎይታ ዘቀመጠ
እቲ ግንባር ኣኽሊል ዝለበጠ
ኣብ ውሽጢ ልቢ ፍቅሪ ሓልዮት ዘቀመጠ
ኣሰይ ብሓቂ ሩፍታ ሪም ክትጥቅም
ጉዳም ፍጥረት ንኩሉ ትዓምም
ዘይተግረምርም ወትሩ ከተመስግን

ደገኛ ሰበይትስ መን ይረክባ∶ ዋጋኣ ኻብ ብኩር ዕንቍ ኣዝዮ ይከብር።ልቢ ሰብኣያ ይእመና፡ እቶቱ ከቶ ኣየቋርጽን።ንሳ ምሉእ ዕድሚኣ ሰናይ እምበር፡ ክፉእ ኣይትገብሮን።መጽሓፍ ምሳሌ31፡10፡12
ጽባቐ መልክዕ ጠባሪ እዩ፡ ውቃበ ኸኣ ከንቱ እዩ፡ ንእግዚኣብሄር እትፈርህ ሰበይቲ ግና ትንኣድ። ካብ ፍረ ኣእዳዋ ሀብዋ፡ ኣብ ደጌታትውን ተግባራ ይንኣዳ። ምሳሌ31፡30