ወላ እንተዘይተረደአኒ
እቲ መጀመርታ ልበይ ምስ ማረኽካ
ብዘይ ሰገጥ ምባል ዘመነይ ሂበካ
ናይ ፍቕሪ ጉዕዞ ምስ ጀመርና ብሓደ
ፍቕርኻ ከይዱ እንዳበርትዓኒ አዝዩ እንዳገደደ
ክጽውዓካ ከለኹ ትምልሰለይ ትሰምዓኒ ብደቓይቕ
አርኢኻኒ ብዃንካ ካብ ትንፋሰይ ትቐርብ
ቀስ ብቐስ ኩልንትናይ ማሪኽካዮ
ደስ እንዳበለኒ ናርዶሰይ አብ እግርኻ አፍሲሰዮ
አብዚ ናይ ፍቕሪ ጉዕዞ እንዳተጉዓዝና
ግዜ ዝመጸ ይመስል ዝፍተን ፍቕርና
እቲ ዝለመድክዎ ወላ እንተዘየለ
ድምጽኻ እንተዘይሰማዕኩ ምምጻእ እንተአቋረጸ
አበይ ደአ ከይዱ ድምጺ ፍትወይ
ይብል ብዙሕ ግዜ ድምጽኻ ክሰምዕ ብምህንጣይ
ግን መንነትካ አይቅየርን እዩ ክሰማማዕ ምስ ስምዒተይ
እሙን ምዃንካ ዓቢ''ዩ ፈቃር አምላኸይ
ፍቅሪ እንተዝህልወካ ይኸውን ምስተወደአ
ግን ንስኻ ባዕልኻ ፍቕሪ ኢኻ እሱዩ መንነትካ
ብዘይካ ፍቕሪ ካልእ ዕላማ ዘይብልካ
ወላ እንተዘይተረደአኒ እዚ ዘለክዎ ወቕቲ
ሓንቲ ነገር ግን ይፈልጥ
ምዃንካ ናይ ልበይ ወናኒ
ትርጉም ምንባረይ ናይ ስጉምታተይ ቀላሲ
ብዝሓልፎ ጎደና ኩሉ እንዳመሃርካኒ እንዳሰለምካ
ኩሉ ነገር ንሰናየይ እንዳቀየርካ
ተንብረኒ አሎኻ ብተአምራትካ
ብሃንቀውታ ይጽበይ አለኹ ክሪኦ ንገጽካ።
