ንጐይታ ከነዕግቦ
ንኣምላኸይ ከዕግቦ ብልበይ ወሲነ
ማለተይ ኮይኑ ካብ ልበይ ሃቂነ
ብኹሉ መኣዝን ብዙሕ ፈቲነ
ከምዚ ክብልውን ኣሕሚመ ሓሊነ
ኣእጋረይ ካብ ከንቱ ጉያ ተመሊሰን
ብስራት ከበስራ ክስመያ ሰናይ ተባሂለን
ኣብራኸይ ንጸሎት ክዕጸፋ ክንብርከኻ
ምእንቲ ነፍሳት ከማልዳ ክልምናኻ
በእዳወይ ክጽዕር ንሰርሕ ክጽሕትር
ንኻልኦት ብምምቓል ብዕሽረይውን ክትከብር
ከናፍረይ ምስክራትካ ክነግራ ከውርያ
ምኡዝ መዛሙር ቃናታት ከፈልፍላ ከዛርያ
የዒንተይ ከምቲ እትሪኦ ኣነጺረን ክሪኣ
ረዲኤተይ ካባኻዩ እናበላ ናባኻ ከቋምታ
ኣእዛነይ ንድምጽኻ ከለልያ ክሰምዓ
ደሃይ ጓስአን ኣነጺረን ክፈልጣ ከጽንዓ
አእምሮይ ንቓላትካ ጥራይ ከዛኒ ከስተንትን
ብምሕዳስ ሓሳቡ ወትሩ ክልወጥ ክስልጥን
ከምዚለ ንጐይታ ክመጻባዕ ከለኹ
ዝበቐቕኩሉ መሰለኒ አካላተይ ዝጎዛዘኹሉ
ድሕሪ ብዙሕ ምውራድ ምድያብ
ሓደ ሓሳብ መጸኒ አቓልቦይ ዝስሕብ
ኣቦታት ከምዝብልዎ ካብ ጉይይ ምውዓል ክሳድ ምሓዝ
ኣነስ ወሲነ ሂወተይ ብምሃብ ንጐይታይ ክእዘዝ
እዝዩ ንጐይታ ዘሕጉሶ ዘዕግቦ
አሕዋት ብዘሎ ሂወትና ንጐይታ ንሃቦ::
