ክልተ ለይቲ’ዩ ዕድሜኣ!
ካብ ሕሰም ከተናግፍያ...
ብሸዓ በቚላ ብሸዓ ዓብያ፡
ከውሊ ዀይና ንርእሲ ኣጽሊላ...
ነብዪ ብተግባራ ኣዝዩ’ዩ ተሓጒሱላ፡
ያኢ! መሲሉዎ ናሕሲ ናይ ገበላ...
ኣስተርሕዩ በጥ ኢሉ’ ዩ ተዛንዩላ፡
መታን ኼማዕዱ ናብታ ዓባይ ከተማ...
ፍርዳ ኪርእዮ ከም ሰዶም ተለኪማ፡
”ነብይ በለ ...ተፈጸመ ድማ!”...
ኪበሃለሉ ሓያል መልእኽተኛ፡
ግዲ የብሉን...
ኣብ ሰበእንስሳ ንዝወሃብ ብየና...
ትንቢቱ ስለ ዝኾነ ንዓዲ ጓና፡
ነገር ግን...
ከም ሰብ ዘይባህሪኡ ’ቲ ላዕለዋይ ዳኛ...
ንልቢ ገርሂ ረኸቦ ኮይኑ ሓደገኛ፡
ስለዚ! ፍረ ንስሓ ምሕረት ምዃኑ ንኸፍልጦ...
ሓሰኻ ለኣኸላ...
ንምቾት ብምረት ክትልውጦ፡
ወዮ! ዘጽለለላስ ብኣጋኡ ’ያ ኣሽኪዓቶ...
ኣለኹ ’ናበለት...
ነቒጻ ዝጠለመቶ፡
ጸሓይን ንፋስን ብግዴኤን ላሕ ’የን ዘበላኦ...
ሞት ኪሳዕ ዚምነ... ኣእወያኦ፡
ብቐደሙስ መዓስ ደኺሙላ...
ዘይ ብሓንቲ ለይቲ እያ በቚላ...
ብሓንቲ ለይቲ ’ውን ተነቒላ...
ባህርይ ኣምላኽ እንድያ ምሂራ፡
ክልተ ለይቲ ’ዩ ዕድሜኣ!...
እሞ ንጒልዒ ዮናስ እንታይ ክንብላ!
