ኣብ ጸግዒ 'ቲ ልዑል
ኣየ ኣነ የዋህ ሰብ እንተዘስተውዕሎ
ትንፋስ ኩሉ ፍጡር አብ ኢድካ ከምዘሎ
ሰማይን ምድርን ብቓልካ ከምዝቖመ
ኩሉ ዝርአን ዘይርአን ብኣኻ ከምዝተፈጥረ
እታ ንዓይ ኢልካ ዝገበርካያ ዕለት
ሎሚ ጥራሕ ምኻና እንተዝግንዘብ
ከምድላይካ ጌርካ ከምትሰርሓኒ
ብድላይካ መገዲ ከምትመርሓኒ
እንተዝርደኦ ብኣግኡ
ክንደይ ኮን ምጸበቐ ኔሩ
ከምቲ ኣቕሓ መሬት ንሰራሒኡ
ከምዚ ጌርካ ስርሓኒ ክብሎ ዘይኮነሉ
ከምቲ ክኾኖ ኢልካ ዝፈጠርካኒ
ከምኡ ኾይነ ከይከውን ንምኻን ኣብዩኒ
ባዕለይ ክኸውን ፈንጠርጠር 'ናበልኩ
ምስ ስጋን ዓለምን እቃለስ ኣለኹ
ምውጻእ'ካ ክንደየናይ ከይወጾ
ካብቲ ዝብለጾስ በዚሑ ዝልሕጸጾ
ምኽንያቱ
እናተጻረረ መንፈሰይ ምስ ስጋይ
ስጋይ ምስ መንፈሰይ
ከምድላየይ ክኸውን ከመይ'ሉ ይኾነለይ
ሓደ ነገር ግን ኣስተብሂለ
ኣብ ጸጋ ኣምላኽ ተወኪለ
ሓይሊ ክርስቶስ 'ናጸዋዕኩ
ድልየታት ስጋይ 'ናገታእኩ
መንፈሰይ ኣሐይለ ክግስግስ
ምስ መንፈስ ኣምላኽ ክምርሽ
እምበር ዓለም ድኣ ሎሚ
'ቲ ጽቡቐይ ትብሎ ኩሉ ተጸንቂቑ
ጉድጋዳ ንውሽጢ ገጹ ዓሚቑ
ክፋኣ 'ንድዩ ክወጽእ ጀሚሩ
ናይ መጨረሽታ ክፋኣ
ድሕሪ ሕጂ'ዶ ግዳ ጽቡቕ ነገር ከይወጽኣ
ጽቡቕስ ሓደን ሓደን ጥራሕ'ዩ
'ቲ ብክርስቶስ ዝርከብ
ናይ ዘለኣለም ህይወት'ዩ
ነዚ ኣስተውዒለ ምስ ኣመንኩ
ዕር...ፍ ኢለ እነብር ኣለኹ
የሱስ ወዲእዎ ከሎ ናተይ ስራሕ
ኣብቲ እንዳ ኣድገ-በቕሊ 'ታይ 'ለኒ ዝርጋሕ
ካብ ገልጠምጠም
ካብ ማዕበላት ናይ ዓለም
ኣብ ጸግዑ ክሓድር ሓሊነ
ኣብ ጽላሉ ክነብር ወሲነ
ምኽንያቱ
ኣብ ጸግዒ 'ቲ ልዑል ዝሓድር
ኣብ ጽላል 'ቲ ኹሉ ዝኽእል ስለዝነብር.
